មូលហេតុ ៥ យ៉ាងដែលទារកស្រែកយំពេលយប់ និងវិធីលួងឱ្យឈប់យំ

ឪពុកម្តាយថ្មីថ្មោងច្បាស់ជាវិលក្បុងដោយសារមិនបានដេកពួន ជាពិសេសនៅពេលកូនតូចស្រែកយំពេលយប់ ហើយមិនដឹងថាវាយំដោយសារអ្វី ឬចង់បានអ្វី។ បើដូច្នេះ សូមងាកមកស្វែងយល់ទាំងអសគ្នាអំពីមូលហេតុដែលទារកយំ និងវិធីសាស្ត្រសំខាន់ៗលួងឱ្យទារកឈប់យំ។

តាមធម្មតា ទារកទើបនឹងកើតតែងតែគេងច្រើន ហើយយំក៏ច្រើនដែរ។ ទារកទើបនឹងកើតភាគច្រើនគេងប្រហែល ៨ ម៉ោងអំឡុងពេលថ្ងៃ និង ៨ ម៉ោងទៀតនៅពេលយប់ ប៉ុន្តែមិនមែនគេងម្ដងជាប់គ្នា ៨ ម៉ោងឡើយ។ ទារកមិនគេងលក់មួយយប់ទល់ភ្លឺ (៦ ទៅ ៨ ម៉ោង) ទេ នោះមានន័យថាគេងភ្ញាក់ច្រើនដងរហូតដល់អាយុយ៉ាងតិច ៣ ខែ ខណៈទារកខ្លះរហូតដល់ ៦ ខែ ឬយូរជាងនេះក៏មាន។ ដូច្នេះអំឡុងពេលនេះ ឪពុកម្ដាយប្រាកដជាវិលក្បុង។

ទោះជាយ៉ាងណា ទារកយំសុទ្ធតែមានមូលហេតុដែលចង់ប្រាប់យើងអ្វីម្យ៉ាង គ្រាន់តែគ្នាមិនចេះ

និយាយ ឬយើងស្ដាប់មិនយល់ប៉ុណ្ណោះ។ ការយំពេលយប់ជាសញ្ញាប្រាប់ថា ទារកត្រូវការឱ្យអ្នកជួយអ្វីម្យ៉ាង។ ហើយទាំងនេះជាមូលហេតុចម្បងៗដែលទារកយំពេលយប់ និងយុទ្ធសាស្ត្រលួងឱ្យទារកឈប់យំ។

យំជាទម្លាប់

ជាទូទៅ ការយំប្រភេទនេះបណ្ដាលមកពីការបំបៅ និងការគេងមិនទៀងពេល។ វាក៏អាចជាសញ្ញាប្រាប់ថា ដល់ពេលទារកឃ្លានបៅ ឬងងុយគេង ឬទារកបៅឆ្អែតជ្រុល។

វិធីគួរអនុវត្ត៖ ដើម្បីលួងទារកឱ្យឈប់យំពេលយប់ ត្រូវលើកទារកបី យកក្រណាត់រុំខ្លួនទារកឱ្យកក់ក្ដៅ ហើយបីដើរចុះដើរឡើងដើម្បីឱ្យទារកទទួលអារម្មណ៍ប៉ះពាល់រាងកាយ។ លើសពីនេះ ឧបករណ៍សន្ដំអារម្មណ៍ ឬកង្ហារក៏អាចជួយឱ្យទារកឈប់យំបានដែរ។

ការបំបៅ

ទារកទើបនឹងកើតត្រូវការបៅរាល់ ២ ទៅ ៣ ម៉ោងម្ដង ព្រោះក្រពះរបស់ទារកតូចណាស់។ ទារកភាគច្រើនយំពេលយប់ដោយសារពួកគេឃ្លាន។

វិធីគួរអនុវត្ត៖ ការយំជាសញ្ញាប្រាប់ថា ទារកឃ្លាន បន្ទាប់ពីទារកបង្ហាញកាយវិការដូចជាលិឍបបូរមាត់ ឬបៀមដៃ។ សូមផ្ទៀងនាឡិកាមើលថា តើទារកបៅលើកចុងក្រោយបាន ២ ឬ ៣ ម៉ោងហើយឬនៅ។ ប្រសិនបើបានហើយ ហើយទារកស្រែកយំជាសញ្ញាប្រាប់ថា ទារកត្រូវការបៅទៀតហើយ។

យំដោយសារឃ្លាន

ប្រសិនបើទារកយំនៅពេលយប់ដោយសារឃ្លាន ទារកមានអារម្មណ៍មួម៉ៅខ្លាំង ហើយពិបាកលួងឱ្យឈប់យំណាស់។ នៅពេលទារកប្រឹងបៅទាំងកខិបកខុប ពេលខ្លះអាចភើចេញទឹកដោះ។ ការយំបែបនេះធ្វើឱ្យទារកពិបាកក្នុងខ្លួន មានអារម្មណ៍មួម៉ៅខ្លាំង ហើយមិនងាយគេងទៅវិញឡើយ។

វិធីគួរអនុវត្ត៖ គួរបំបៅទារក មុនពេលទារកឃ្លានខ្លាំងជ្រុល។ ការដកធ្លាទុកឱ្យទារកភើសិនអំឡុងពេលបំបៅក៏អាចជួយឱ្យទារកឈប់យំបានដែរ។ ប្រសិនបើអ្នកបំបៅទារកដោយទឹកដោះគោ សូមពិគ្រោះជាមួយគ្រូពេទ្យជំនាញអំពីប្រភេទម្សៅទឹកដោះគោ។

យំដោយសារបញ្ហាអាឡែស៊ី

នៅពេលទារកយំយូរ ហើយមិនទាក់ទងការឃ្លាន ការគេង ឬការមិនស្រណុកក្នុងខ្លួនជាទូទៅ នោះប្រហែលជាបណ្ដាលមកពីបញ្ហាអាឡែស៊ីទៅនឹងម្សៅទឹកដោះគោហើយ។ ការឆ្អុលពោះដោយសារបញ្ហាអាឡែស៊ីនេះអាចបណ្ដាលឱ្យទារកយំតាមលំអាន ៣ ដូចជា៖ យំលើសពី ៣ ម៉ោងក្នុងមួយថ្ងៃ (ជាធម្មតានៅពេលល្ងាច) យំលើសពី៣ ថ្ងៃក្នុងមួយសប្តាហ៍ និងយំលើសពី ៣ សប្តាហ៍។

វិធីគួរអនុវត្ត៖ អ្នកគួរពិគ្រោះជាមួយគ្រូពេទ្យឯកទេសខាងកុមារដើម្បីកំណត់ថា តើកូនរបស់អ្នកយំដោយសារបញ្ហាអាឡែស៊ីទៅនឹងម្សៅទឹកដោះគោ ឬយ៉ាងណា។ ប្រសិនបើពិនិត្យឃើញថា កូនរបស់អ្នកមានបញ្ហាអាឡែស៊ីនេះ សូមពិគ្រោះជាមួយគ្រូពេទ្យ។

ចំណុចផ្សេងទៀតដែលទារកមិនស្រណុកក្នុងខ្លួន

ទោះបីក្រពះរបស់ទារកទៀងប្រៀបដូចនាឡិការោទិ៍យ៉ាងណាក្ដី ក៏មានកត្ដាផ្សេងទៀតដែលធ្វើឱ្យទារកយំនៅពេលយប់ដែរ ហើយខាងក្រោមជាចំណុចដែលគួរពិនិត្យមើល៖

● កន្ទបដែលត្រូវប្តូរចេញ

● ម្រាមដៃត្របាញ់ចូលគ្នា

● បន្ទប់ដែលឡើងកម្ដៅ ឬត្រជាក់ពេក

● ទារកឈឺ (ទារកផ្ដាសាយ ឬដំបៅត្រចៀកគេងភ្ញាក់ៗខុសពីធម្មតា

វិធីគួរអនុវត្ត៖ ជាពិសេស ប្រសិនបើអ្នកទើបបំបៅកូនរួច ហើយកូននៅតែមួម៉ៅ សូមពិនិត្យមើលកត្តាផ្សេងទៀតដើម្បីរកវិធីលួងឱ្យទារកឈប់យំ។ ការរហ័សប្តូរកន្ទបចេញមុនពេលបំបៅក៏ធ្វើឱ្យទារកមានអារម្មណ៍ស្ងប់ដែរ ពេលកំពុងបៅ។ ប្រសិនបើសង្ស័យថាកូនឈឺ សូមប្រញាប់ស្ទង់កម្ដៅខ្លួនកូន ហើយបើកម្ដៅឡើងលើសពី ៣៨ អង្សាជាសញ្ញាប្រាប់ថា ត្រូវប្រញាប់នាំកូនទៅជួបពេទ្យ។