កំហុស​ឆ្គង​ពេល​សង់​ទ្វារដែល ធ្វើ​ឲ្យ​លុយ​ហូរ​ចេញ​ដូច​ទន្លេ គ្មាន​ថ្ងៃ​សល់​លុយ!

យោងតាមក្បួនហុងស៊ុយ ទ្វារធំមុខផ្ទះ គឺជារបស់ដែលរក្សាទ្រព្យសម្បត្តិរបស់ក្រុមគ្រួសារទាំងមូល ដូចនេះបើសង់ខុសក្បួននោះ ទ្រព្យនឹងចែកជើងគ្នាហូរចេញដូចទឹក។ ខាងក្រោមនេះគឺជាកំហុសឆ្គងមួយចំនួននៅពេលសង់ទ្វារផ្ទះដែលអ្នកគួរជៀសវាង។

១. ទ្វារនៅទល់មុខជ្រុងស្រួច៖ តាមតម្រាហុងស៊ុយ បើទ្វារនៅទល់មុខជ្រុងស្រួចគឺជាការឆុងដ៏កាចបំផុត។ ជ្រុងស្រួចមុខផ្ទះដូចជាច្រមុះជ្រូក ផ្លូវបំបែកជា២ ផ្លូវបំបែកជាបី ត្រូវបានគេចាត់ទុកថាជាអ្នកបំផ្លាញទ្រព្យផ្ទះ។ អាស្រ័យហេតុនេះហើយ នៅពេលទិញដី ទិញផ្ទះ អ្នកគួរជៀសវៀងកន្លែងដែលមានចំណុចទាំងនេះ។ បើប៉ះចំមានកន្លែងទាំងនេះហើយ យើងអាចជៀសវាងវិញដោយការបង្វែរទិសផ្ទះ

២. ទ្វារមុខ និងទ្វារក្រោយស្របគ្នា៖ ទ្វារមុខ និងក្រោយដែលមានលក្ខណៈស្របគ្នា ឬមើលពីមុខ ធ្លាយដល់ក្រោយគឺសុទ្ធសឹងតែជារបៀបទ្វារដែលត្រូវតមទាំងអស់។ ទ្វារបែបនេះ ត្រូវគេហៅថាផ្លូវដែកធ្លុះ និងមានហុងស៊ុយមិនល្អឡើយ។ វាបង្ហាញឲ្យឃើញថា លុយរកចូលច្រកមុខ និងចេញអស់តាមច្រកក្រោយ។ ដើម្បីជៀសវាង យើងគួរធ្វើទ្វារមុខក្រោយ នៅលើជ្រុងខុសគ្នា ឧទាហរណ៍ទ្វារមុខធ្វើខាងស្ដាំផ្ទះ ទ្វារក្រោយគួរធ្វើខាងឆ្វេងផ្ទះ។

៣. ទ្វារមុខកញ្ឆត ហើយបែកកញ្ចក់៖ ទ្វារមុខនៅក្នុងក្បួនហុងស៊ុយត្រូវបានប្រៀបថាជាអ្នកយាមទ្រព្យសម្បត្តិនៅក្នុងផ្ទះ។ ដូចនេះបើទ្វារមានលក្ខណៈកញ្ឆត ពុក ឬបែកកញ្ចក់នោះ ប្រាក់កាក់របស់ម្ចាស់ផ្ទះ ក៏ហូរចេញតាមចន្លោះទាំងអស់នោះដែរ។ អាស្រ័យហេតុនេះ ទ្វារធំមុខផ្ទះ គួរជ្រើសយកលក្ខណៈដែលរឹងមាំ ធន់នឹងទឹកភ្លៀង ក៏ដូចជាកម្ដៅថ្ងៃ និងគួរជួសជុលភ្លាមៗបើមានការបាក់បែកជៀសវាងទុកឲ្យខូចយូរ៕

បើកទ្វារផ្ទះមកឃើញរបស់ ៣ យីអ៊ុនម្ចាស់ផ្ទះនឹងដាំក្បាលចុះ រីឯប្តីប្រពន្ធក៏ទាស់សម្តីគ្នាច្រើន

តាមក្បួនហុងស៊ុយនៅទ្វារមេនៃផ្ទះរបស់អ្នក គេមិនឲ្យបើកមកឃើញរបស់ទាំង ៣ នេះនៅនឹងមុខនោះទេ ព្រោះតាមក្បួនគឺវាងាយនឹងនាំឲ្យអ្នកក៏ដូចជាសមាជិកគ្រួសារជួបបញ្ហានានាជាបន្តបន្ទាប់៖

៣) បើកទ្វារមកឃើញផ្ទះបាយ

ក្នុងក្បួនហុងស៊ុយ ចង្រ្កានបាយតំណាងឲ្យអគ្គីភ័យ (ការឆេះ)។ ប្រសិនអ្នកដាក់ទីតាំងផ្ទះបាយនៅចំពីមុខទ្វារចូលផ្ទះ វាជាហេតុមិនល្អ ដែលងាយឲ្យម្ចាស់ផ្ទះរបូតទ្រព្យ និងមានការខាតបង់។ ដូចគ្នាទៅនឹងទូទឹកកក ក៏មិនណែនាំឲ្យដាក់ក្បែរមាត់ទ្វារចូលផ្ទះដែរ ព្រោះវាអាចបង្កការលំបាកដល់ផ្លូវរកស៊ី រាំងស្ទះមិនឲ្យទទួលបានជោគជ័យ។

២) បើកទ្វារមកឃើញបង្គន់

រចនាបថនៃផ្ទះរបស់អ្នក ហាមដាច់ខាតមិនត្រូវបើកទ្វារមកឃើញបង្គន់នៅចំពីមុខនោះទេ។ ក្រៅពីការសាយភាយនៅបាក់តេរី ដែលតាមបែបបទវិទ្យាសាស្រ្ត មកមើលបែបបទក្បួនហុងស៊ុយ ធម្មតាទ្វារមេជាកន្លែងស្វាគមន៍ទ្រព្យ ស្វាគមន៍សំណាងចូលផ្ទះ ដល់តែបើកមកឃើញបង្គន់ វានឹងផ្ទុយពីលាភមកក្លាយជាគ្រោះវិញ។

១) បើកទ្វារមកឃើញអាសនៈ

កន្លែងថ្វាយបង្គំ គោរពបូជា ទីអាសនៈជាកន្លែងសក្ដិសិទ្ធិដែលគ្រួសារនីមួយៗត្រូវឲ្យតម្លៃខ្ពស់ណាស់។ យ៉ាងណាបើទីតាំងអាសនៈនៅចំពីមុខទ្វារធំ គឺជាការនាំសំណាងមិនល្អទៅវិញ អ្នកគួរដាក់នៅទីតាំងស្ងប់ស្ងាត់ណាមួយ ឬនៅបន្ទប់ដាច់ដោយឡែកបើជាអាច៕

បញ្ជាក់ថាទាំងអស់នេះ គ្រាន់តែជាការប្រែសម្រួលតាមឯកសារយោងប៉ុណ្ណោះ ហើយវាផ្អែកតាមទំហំនៃផ្ទះរបស់មនុស្សម្នាក់ៗដែរ បើសម្រាប់ប្រភេទផ្ទះតូច ឬបន្ទប់ខុនដូ គឺយើងមិនរាប់បញ្ចូលឡើយ៕

ប្រភព៖ បរទេស | ប្រែសម្រួល៖ ក្នុងស្រុក