ភ្នំពេញៈ សហភាពអឺរ៉ុប បានចេញសេចក្តីថ្លែងការណ៍មួយ អំពាវនាវដល់គណបក្សជាប់ឆ្នោតទាំងពីរ គឺគណបក្សប្រជាជនកម្ពុជា និងគណបក្សសង្គ្រោះជាតិ ឲ្យបន្តកិច្ចពិភាក្សាគ្នា ដើម្បីឲ្យសមាជិកសភា ដែលត្រូវប្រជាពលរដ្ឋកម្ពុជាបោះឆ្នោតឲ្យនោះ អាចបំពេញការងាររបស់ខ្លួនបានពេញលេញ។
សម័យប្រជុំសភាដំបូង ត្រូវបានបើកនៅថ្ងៃនេះ ក្រោមអធិបតីភាពព្រះមហាក្សត្រ និងមានតែតំណាងរាស្ត្រគណបក្សប្រជាជនកម្ពុជាប៉ុណ្ណោះ ក្នុងនោះក៏មានបណ្តាអង្គទូតនានា និងសហភាពអឺរ៉ុបចូលរួមផងដែរ។
សហភាពអឺរ៉ុប មានជំនឿថា រដ្ឋសភាថ្មី ដែលបានបើកកិច្ចប្រជុំ នាព្រឹកថ្ងៃទី២៣ កញ្ញា មិនអាចដំណើរការទៅបាន ដោយគ្មានការចូលរួមពីគ្រប់គណបក្សជាប់ឆ្នោតនោះទេ។
ក្នុងសេចក្តីថ្លែងការណ៍ចេញផ្សាយនៅថ្ងៃចន្ទនេះ សហភាពអឺរ៉ុប ក៏បានសម្តែងក្តីបារម្ភលើជម្លោះ ដែលកើតចេញពីភាពមិនប្រក្រតីនៃដំណើរការបោះឆ្នោត ហើយបន្តអំពាវនាវដល់គណបក្សនយោបាយទាំងអស់ ឲ្យធ្វើការជាមួយគ្នាបន្តទៀត ក្នុងការដោះស្រាយភាពមិនប្រក្រតីនៃដំណើរការបោះឆ្នោត ដើម្បីឈានទៅកែទម្រង់ដំណើរការបោះឆ្នោតលើកក្រោយ ដូចជា បញ្ជីឈ្មោះបោះឆ្នោត ប្រព័ន្ធផ្សព្វផ្សាយ និង គ.ជ.ប ជាដើម។
សហភាពអឺរ៉ុប ក៏បានលើកទឹកចិត្តដល់គណបក្សនយោបាយ ឲ្យបន្តកិច្ចពិភាក្សាគ្នា ដើម្បីឈានទៅដល់ការកែទម្រង់រចនាសម្ព័ន្ធ ដែលនឹងផ្តល់អត្តប្រយោជន៍ដល់និរន្តភាពនៃការអភិវឌ្ឍន៍ រួមទាំងកែទម្រង់ប្រព័ន្ធយុត្តិធម៌ ការកែទម្រង់រដ្ឋសភា និងកិច្ចប្រឹងប្រែងដទៃទៀត សម្រាប់បង្កើនល្បឿនអភិបាលកិច្ចល្អ និងលទ្ធិប្រជាធិបតេយ្យ។
http://www.postkhmer.com/index.php/online/104306-2013-09-23-11-51-44
Post A Comment: