ជីវជាតិ​ដែល​ស្ត្រី​មាន​ផ្ទៃពោះ​ត្រូវការ​ដើម្បី​កូន​កើត​មក​ឆ្លាត​ជាង​ក្មេង​ដទៃ​

របបអាហារផ្តល់សុខភាព មានតុល្យភាពក្នុងពេលមានផ្ទៃពោះគួរតែជារបស់ដែលសំខាន់សម្រាប់បង្កើនការលូតលាស់ខួរក្បាលរបស់ទារកក្នុងផ្ទៃពោះ។ ដូច្នេះខ្ញុំសូមណែនាំនូវជីវជាតិមួយចំនួនដែលមានសារៈសំខាន់យ៉ាងពិសេសសម្រាប់ការលូតលាស់ខួរក្បាលរបស់ទារកដូចជា៖

ខូលីន

តាមការសិក្សាបានឲ្យដឹងថា សារធាតុខូលីនអាចមានឥទ្ធិពលពង្រីកការលូតលាស់របស់ខួរក្បាលទារកក្នុងផ្ទៃម្តាយដោយផ្ទាល់តែម្តង។ ស៊ុតគឺជាប្រភពដ៏ល្អបំផុតនៃសារធាតុមួយនេះ ក្រៅពីនេះក៏មានទឹកដោះគោ ផ្កាខាត់ណា សាច់មាន់ និងសាច់គោដែរ។

ជាតិដែក

ជាតិដែកគឺជាជីវជាតិមួយផ្សេងទៀតដែលសំខាន់សម្រាប់ខួរក្បាលទារក។ តាមការសិក្សាបានរកឃើញថា កាលណាជាតិដែលចូលទៅចិញ្ចឹមកូនក្នុងផ្ទៃតិច អាចធ្វើឲ្យភាពឆ្លាតវ៉របស់វាគេថយចុះ ជាពីសេសជំនាញក្នុងការរៀនភាសាតែម្តងនៅពេលគេអាយុបាន ៥ឆ្នាំ។

អាស៊ីតខ្លាញ់អូមេហ្គាបី

អាស៊ីតខ្លាញ់អូមេហ្គាបីជាសារធាតុដ៏សំខាន់ក្នុងការបង្កើតខួរក្បាល និងរ៉េទីន។ សារធាតុមួយនេះមានច្រើនក្នុងត្រីសាលម៉ុង សណ្តែកសៀង និងតៅអ៊ូជាដើម។

ប្រូតេអ៊ីន

ការដែលខ្វះជាតិប្រូតេអ៊ីន ក៏អាចប៉ះពាល់ដល់ការលូតលាស់សរសៃប្រសាទក្នុងខួរក្បាលទារកបានដែរ ហើយវាក៏នឹងធ្វើឲ្យទារករៀនមិនងាយចេះថែមទៀត។ ដូច្នេះចូរប្រាកដថា អ្នកបានញ៉ាំអាហារសម្បូរជាតិប្រូតេអ៊ីនគ្រប់គ្រាន់ក្នុងពេលមានផ្ទៃពោះដូចជា សាច់បក្សី អាហារធ្វើពីទឹកដោះគោ និងសាច់សុទ្ធ។ សណ្តែកសៀង និងគ្រាប់ធញ្ញជាតិក៏សម្បូរជាតិប្រូតេអ៊ីនដែរ។

ស័ង្គសី

អ្នកស្រាវជ្រាវបានរកឃើញថា កាលណាខ្វះជាតិស័ង្គសីក្នុងពេលមានផ្ទៃពោះ វានឹងប៉ះពាល់ដល់មុខងារខួរក្បាលរបស់ទារក។ សំណាងដែរ យើងអាចរកបានជាតិស័ង្គសីយ៉ាងងាយពី សាច់គោ សាច់ចៀម សាច់ជ្រូក និងគ្រាប់ធញ្ញជាតិ។

ខណៈពេលដែល ការបញ្ចូលអាហារសម្បូរជីវជាតិទាំងអស់ខាងលើក្នុងរបបអាហារប្រចាំថ្ងៃគឺជារឿងសំខាន់ តែការប្រើថ្នាំបំប៉នដោយគ្មានការណែនាំពីគ្រូពេទ្យពិតជាមិនមែនរឿងល្អឡើយ ព្រោះកាលណារាងកាយទទួលបានជីវជាតិខាងលើច្រើនជ្រុល វានឹងនាំឲ្យលូតលាស់ខួរក្បាលមិនធម្មតាវិញ៕