ការធ្វើការអោយគេ ជាប្រភពទុននៃការចាប់ផ្តើម​អាជីវកម្មខ្លួនឯង

នៅក្នុងបទបង្ហាញកាលល្ងាចមិញ របស់លោកឧកញ្ញ៉ា ម៉ុង ឬទ្ធី បានបង្ហាញនូវបទពិសោធន៍និង ចំណេះដឹងផ្ទាល់ខ្លួន ដែលលោកធ្លាប់ប្រកបអាជីវកម្មទទួលបានជោគជយ័នៅកម្ពុជា។ ក្នុងបទឧទ្ទេសនាមនេះ លោកឧកញ្ញ៉ា បានលើកឡើងថា«មុនចាប់ផ្តើមអាជីវកម្មផ្ទាល់ខ្លួន ត្រូវចាប់ផ្តើមធ្វើការឲ្យគេសិន» លោកថាកុំអាលប្រញាប់ចាប់ផ្តើមអាជីវកម្មខ្លួនឯងភ្លាមៗ។

លោកឧកញ៉ាបានពន្យល់ថា ការធ្វើការងារឲ្យគេជាទុនមួយដ៏សំខាន់ ព្រោះគ្រប់ការងារទំាងអស់សុទ្ធតែបង្រៀនលោកអ្នកទាក់ទងនឹងគំនិតអាជីវកម្ម ហើយបន្ទាប់មកលោកអ្នកត្រូវតែចាប់យកគន្លឹះណាមួយនៃការងារមកបង្កើតជាអាជីវកម្មសម្រាប់ខ្លួនឯង។ លោកបានបន្ថែមថា ពេលខ្លះលោកអ្នកចង់រកស៊ីតែមិនដឹងរកស៊ីជំនួញអ្វី លោកអ្នកអាចធ្វើការងារឲ្យគេសិនទម្រាំរកឃើញនូវឱកាសល្អ និងមុនរបបណាមួយ នោះយើងក៏មានបទពិសោធន៍ស្រាប់ដែរ។

លោកបានបន្តថា បើអ្នកខ្វះទុនត្រូវយកខ្លួនធ្វើជាដើមទុន ពោលគឺត្រូវធ្វើការឲ្យគេសិន ព្រោះពេលធ្វើការ លោកអ្នកមិនបានគិតតែពីប្រាក់ខែទេ លោកបានដឹងថា អ្វីដែលសំខាន់ជាងប្រាក់ខែ គឺចំណេះដឹងដែលយើងរៀនសូត្រពីការងារ ដើម្បីយកធ្វើទុនពេលចាប់ផ្តើមរកស៊ីខ្លួនឯង។

គួរបញ្ជាក់ដែលថា លោកឧកញ៉ា ម៉ុង ឬទ្ធី ក៏ជាអ្នកជំនួញដែលមានទ្រព្យធន យ៉ាងសម្បើមម្នាក់នៅក្នុងប្រទេសកម្ពុជាភា្លម។ ថ្វីត្បិតតែមានទ្រព្យសម្បត្តិច្រើនបែបនេះក៏ពិតមែន តែលោកតែងធ្វើខ្លួនជាមនុស្សសាមញ្ញ និង ជាទីគោរពស្រឡាញ់នៃប្រជាជនភាគច្រើនផងដែរ ព្រោះតែលោកចូលចិត្តប្រើជីវិតដូចជាប្រជាជនធម្មតា ហើយតែងជួយដល់ប្រជាជនតាមរយៈ ជំនួញដែលលោកបានបង្កើតទៀតផង៕