ខាងក្រោមនេះគឺសុភាសិតខ្មែរនិងសាកល ដែលទាក់ទងនឹងការនិយាយស្តី នៅក្នុងសង្គម ដែលយើងខ្ញុំបានចងក្រងជាបណ្ដុំ ៦៨។ ចំនួននេះនឹងកើនបន្ថែម បើសិនយើងខ្ញុំបានទះ ភាសិតថ្មីទៀតក្នុងន័យដូចគ្នានេះ។ បើលោកអ្នកមិត្តអ្នកអាន មានគំនិតបន្ថែម ផ្ដល់ជាមតិនៅខ្ទង់មតិខាងក្រោម យើងខ្ញុំនឹងដាក់បញ្ចូលនៅក្នុងបញ្ជីនេះ។ អរគុណ។
- សម្តីសជាតិ មារយាទសពូជ ។
- ឣណ្តាតជាឣាថ៏កន្លង បានសុខទុក្ខផងពីព្រោះឣណ្តាត ។
- កុំបណ្តោយឲ្យឣណ្តាតរលាស់មិនឈប់ពេក ។
- សម្តីជាឯក លេខជាទោ ។
- ឣ្នកពូកែនិយាយ ពូកែប្រយុទ្ធ ។
- ដើរឲ្យមានបី ស្រដីឲ្យមានបួន (មិននិយាយកុហក១ មិននិយាយអសុរស១ មិននិយាយញុះញង់គេ១ មិននិយាយពាក្យឥតប្រយោជន៍១) ។
- ត្រីកំភ្លាញងាប់ដោយសារមាត់ ។
- និយាយឲ្យតិចស្តាប់ឲ្យច្រើន ឲ្យដូចជាត្រចៀកពីរមាត់មួយដូច្នោះដែរ
- ប្រយ័ត្នជញ្ជាំងមានត្រចៀក ។
- និយាយយប់ផ្ចប់ព្រៃ និយាយថ្ងៃព្រៃមានត្រចៀក ។
- និយាយល្អមួយពាន់ដង មិនស្មើធ្វើល្អម្តង ។
- ផ្កាឈើមានទ្រង់ទ្រាយល្អ មានពណ៌ (ល្អ) តែគ្មានក្លិន (ក្រអូប) រមែងមិនក្រអូបដល់អ្នកដែលទ្រទ្រង់ ដូចម្តេចមិញ វាចាជាសុភាសិត រមែងគ្មានផលដល់អ្នកដែលមិនធ្វើតាមដូច្នោះ ផ្កាឈើដែលមានទ្រង់ទ្រាយល្អ មានពណ៌ មានក្លិន រមែងក្រអូបដល់អ្នកដែលទ្រទ្រង់ ដូចម្តេចមិញ វាចាជាសុភាសិត រមែងមានផលដល់អ្នកដែលធ្វើតាមដោយគោរព ដូច្នោះឯង
- សម្ដីមនុស្សនិងសត្វយំ
- ពាក្យពិតរែងស្លែង ។
- ពាក្យទូន្មានច្រើនតែល្វីងជូរចត់ ។
- ថ្នាំដែលពូកែ ច្រើនតែមានរសជាតិល្វីង ។
- ពាក្យសង្ឃពាក្យសត្យ ។
- ពាក្យចាក់ដោតទាំងឡាយរបស់ជនដទៃ បុគ្គលមិនគួរធ្វើទុកក្នុងចិត្តទេ
- ភ្លើងក្នុងកុំនាំចេញក្រៅ
- និយាយឲ្យមើលលើមើលក្រោម ។
- ឣឹមឣៀមស្ងៀមជាងស្រដី ស៊ីចេកខ្ចីជាជាងនៅមាត់ទំនេរ ។
- ស្ងាត់ស្ងៀមគឺជាមាស ។
- បើមិននិយាយ ក៏គ្មាននរណាថាគដែរ ។
- មាត់ស៊ីស្បែកជើង ។
- កុំអាងតែមានអណ្ដាត ចេះតែគ្រលាស់ ។
- អណ្ដាតអត់ឆ្អឹងរបស់ស្រី រឿងអ្វីៗ ហារស្តីឲ្យតែបាន ស្រឡាញ់រួចភ្លេចក្រឡះប្រាណ អណ្ដាតសាមាន្យដិតដាមជាំខ្មៅ
- កោកៗសឹកមាត់ត្រដោក ឆ្អែតពោះក្របី ។
- ឆ្កែចេះតែព្រុស មនុស្សចេះតែដើរ ។
- រនាបបាក់ យករនាបជួស សម្ដីជ្រុលហួស ជួសមិនបាន ។
- មនុស្សគេយកសម្តី ដំរីគេយកភ្លុក ។
- ចាប់គោគេចាប់ស្នែង ចាប់មនុស្សគេចាប់សំដី ។
- ពាក្យច្រើនភូត ចាញ់អាត្មា ។
- ធនធានមិនស្មើវិជ្ជា ធូធាមិនស្មើវាចា ។
- និយាយច្រើន ច្រើនខុស ។
- ពាក្យភូត ស្តាប់គួរឆ្ងល់ ។
- ពាក្យកុហកបោកប្រាស មិនដែលបញ្ចប់តាមសម្រួលទេ ។
- ភូតនៅហោរ ចោរនៅជាង ។
- ឣ្នកកុហកនិងឣ្នកលួចសុទ្ធតែឣ្នកចេះបំភាន់ ។
- ឣ្នកនិយាយកុហក ដឹងការពិតពាក់កណ្តាល ។
- មាន់ណាខ្តត មាន់នោះពង ។
- មាន់គកនឹងរងាវនៅពេលវាជុះឣាចម៏ពេលព្រឹក ។
- មាត់ឥតគ្រប ដបឥតឆ្នុក ។
- មេជ្រូកដើរថ្ងូររឣ៊ូរទាំ បានត្រឹមតែគេធុញទ្រាន់ប៉ុណ្ណោះ ។
- មឹះៗ កឹះឆ្នាំងបាយធ្លុះ ។
- ឣណ្តាតដែលនៅស្ងៀម ធ្វើឲ្យក្បាលទៅជាឆ្លាត ។
- មុននិយាយ ឲ្យគ្រលាស់ឣណ្តាតជាមុន ។
- គិតមុន ចាំនិយាយជាក្រោយ ។
- ស្ដោះទឹកមាត់ទៅលើមេឃ វាធ្លាក់លើទ្រូងឯង ។
- ឣ្នកស្តោះទឹកមាត់បញ្ច្រាសខ្យល់ វាបក់មកលើមុខខ្លួនឯង ។
- រស់តែមាត់ ត្រគាកស្លាប់ស្តូក ។
- ឆ្កែដែលព្រុះពីចម្ងាយ មិនខាំឣ្វីនៅក្បែខាងទេ ។
- ឆ្កែព្រុះមិនដែលខាំ ។
- លេបវាស្លាក់ ខ្ជាក់វាស្លែង ។
- ឡូឡាមិនត្រៀម ស្ងាត់ស្ងៀមមិនត្រាយ ។
- សំដីប្រាប់ភាសា កិរិយាប្រាប់ជាតិ មារយាទប្រាប់ពូជ ។
- សម្ដីពីរោះមានក្នុងអសប្បុរស ថ្នាំពិសចំរុះក្នុងទឹឃ្មុំ រសឆ្ងាញ់មានជាតិពុលលាយឡំបីនេះសូមផ្ដាំត្រូវប្រយ័ត្ន
- ពាក្យល្អអសប្បុរសមិនត្រូវការ ក្រៀលបក្សាមិនត្រូវផឹកទឹកដោះ ស្ដ្រីជាសត្រូវនឹងតាបស ដំរីខ្លាពស់ជាសត្រូវអ្នកដើរព្រៃ
- អារឿងគេជេរវាមានទៅបាបអីខ្ញុំតែរឿងដែលធំកុំតែខ្ញុំជេរគេ ។
- អារឿងគេថាវាមានទៅខាតអីខ្ញុំ តែរឿងដែលធំកុំតែខ្ញុំថាគេ ។
- រឿងខានស្ដាប់ធម៌ជារឿងធំ សព្វបើគ្រាន់តែអារឿងខានស៊ីនំ ចាំបាច់នៅផ្ទះអន្ទះសា
- ស្រដីអោយស្រួលស្រេច គិតសេចគ្រេចកុំគិតងាយ រំពឹងគិតអោយឆ្ងាយ យល់ដោយផ្លូវសព្វនានា
- បានតែពាក្យត្រគាកស្លាប់ស្ដូក ៖ បានតែខាងនិយាយស្ដីថាឲ្យគេ តែខ្លួនឯងឥតធ្វើអ្វីសោះ
- និយាយយប់ខ្ទប់ព្រៃ និយាយថ្ងៃថ្ងៃមានត្រចៀក កំភ្លាញងាប់ពីព្រោះមាត់ ដេកយប់កុំនិយាយនឹងស្រី
- ជនឯណាមាត់ក្រអូបដូចបទុម ពាក្យភិរម្យដូចជាតិចន្ទន៍ត្រជាក់ តែក្នុងពោះដូចពិសមុតដូចចក្រ ជននោះគួរកុំស័គ្រស្មាគមឡើយ
- ជាតិខ្លឹមចន្ទន៍ត្រជាក់ក្នុងលោកា ដួងចន្ទ្រាត្រជាក់លើសខ្លឹមចន្ទន៍ សុភាសិតសប្បុរសពោលធម្មក្ខន្ធ ត្រជាក់លើសខ្លឹមចន្ទន៍និងចន្ទ្រា
- អ្នកដែលនិយាយដោយមិនមានភាពមិនលើកកម្ពស់ខ្លួនឯង នឹងពិបាកក្នុងការធ្វើឲ្យពាក្យសម្ដីរបស់ខ្លួនមានន័យល្អ
- បុគ្គលឧត្តមខ្ពង់ខ្ពស់តែងតែដាក់ខ្លួន ក្នុងការនិយាយស្តី ប៉ុន្តែធ្វើឲ្យលើសលុបក្នុងសកម្មភាពរបស់ខ្លួន
- សម្ដីជាខ្នោស
