មកទាល់និងពេលនេះជាង ៦០ឆ្នាំហើយ ដែលកូរ៉េបងប្អូនទាំងពីរនេះធ្លាក់ទៅក្នុងសង្គ្រោម និងបាត់បង់អាយុ ជិវិតប្រជាជនស្លូតត្រង់ នៅលើទឹកនេះរាល់លាននាក់។
កាលដើមឡើយប្រទេសកូរ៉េគឺជាប្រទេសតែមួយ ស្ថិននៅក្រោមសន្តតិវង្ស Joseon (Kingdom of Joseon) តែមួយ ក្នុងចន្លោះឆ្នាំ១៣៩២ ដល់ ១៨៩៥ នេះបើតាមឯកសារ ដែលចេញផ្សារដោយ Wikipedia។ ពួកគេបានប្រើប្រាស់ភាសារតែមួយ វប្បធម៍តែមួយ។
តើមូលហេតុអ្វីដែលធ្វើអោយកូរ៉េទាំងពីរពុះហែកទឹកដីនេះទៅជាពីរ?
រឿងរ៉ាងដ៏កម្សត់បានចាប់ផ្តើមឡើងតាមរយការវាយដណ្តើមយកពីសំណាក់ប្រទេសជប៉ុន នៅចុងសតវត្សទី១៩ ការបែកជាពីរប្រទេស រវាងកូរ៉េខាងជើង និងខាងត្បូងដែលធ្លាប់តែរួបរួមគ្នាតែមួយ កើតឡើងដោយហេតុនេះឯង។
អាណាចក្រជប៉ុនបានកាត់យកឧបទ្វីបកូរ៉េជាផ្លូវការនៅឆ្នាំ១៩១០ ហើយចាប់តាំងពីពេលនោះមក រហូតដល់១៩៤៥ កូរ៉េគឺជាប្រទេសចំណុះអោយជប៉ុន។ ជប៉ុនបានគ្រប់គ្រងប្រទេសកូរ៉េដោយប្រើអធិរាជអាយ៉ងចាប់តាំងពីជ័យជម្នះរបស់ពួកគេនៅឆ្នាំ១៨៩៥ក្នុងសង្គ្រាម Sino-Japanese លើកទីមួយ។
ពេលដែលសង្គ្រាមលោកលើកទី២បានបញ្ចប់ទៅនៅឆ្នាំ១៩៤៥ រឿងរ៉ាវគឺច្បាស់ណាស់ដែលសម្ព័ន្ធមិត្តអាមេរិកនឹងត្រូវចូលកាន់កាប់ទឹកដីដែលស្ថិតក្រោមការគ្រប់គ្រងរបស់ជប៉ុន រាប់បញ្ចូលទាំងប្រទេសកូរ៉េ ទម្រាំមានការបោះឆ្នោតត្រូវបានរៀបចំ ហើយរដ្ឋាភិបាលក្នុងស្រុកត្រូវបានតែងតាំង។
រដ្ឋាភិបាលសហរដ្ឋអាមេរិកបានដឹងថា ខ្លួននឹងកាន់កាប់ហ្វីលីពីន ព្រមទាំងជប៉ុន ដូច្នោះហើយពួកគេស្ទាក់ស្ទើរក្នុងការទទួលខុសត្រូវគ្រប់គ្រងកូរ៉េ។ ទន្ទឹមនឹងគ្នានោះដែរ កូរ៉េ មិនមែនជាប្រទេសអាទិភាពសម្រាប់អាមេរិកនោះទេ។ ចំណែក សូវៀត នោះវិញ ពេលនោះគឺលើសពីចង់ចូលកាន់កាប់ទឹកដីដែលរដ្ឋាភិបាល Tsar បានបោះបង់ក្រោយពីសង្គ្រាម Russo-Japanese ឆ្នាំ១៩០៤ដល់១៩០៥ ទៅទៀត។
នៅថ្ងៃទី៦សីហា ឆ្នាំ១៩៤៥ សហរដ្ឋអាមេរិក បានទម្លាក់គ្រាប់នុយក្លេអែរលើទីក្រុង ហេរ៉ូស៊ីម៉ា របស់ជប៉ុន។
ពីរថ្ងៃក្រោយមក សហភាពសូវៀត បានប្រកាសសង្គ្រាមនឹងជប៉ុន ហើយចូលឈ្លានពាន Manchuria ។ កងទ័ពជើងទឹករបស់ សូវៀត ក៏បានចូលកាន់កាប់បីទីតាំងនៅតាមឆ្នេរភាគខាងជើងនៃប្រទេសកូរ៉េផងដែរ។ នៅថ្ងៃទី១៥សីហា ក្រោយពីការទម្លាក់គ្រាប់បែកនុយក្លេអែរទៅលើទីក្រុង ណាហ្គាសាគិ ព្រះចៅអធិរាជ Hirohito បានប្រកាសពីការចុះចាញ់របស់ជប៉ុន ដោយបញ្ចប់សង្គ្រាមលោកលើកទីពីរ។
នៅ៥ថ្ងៃមុនពេលជប៉ុនសារភាពចុះចាញ់ មន្ត្រីអាមេរិក Dean Rusk និង Charles Bonesteel បានទទួលភារកិច្ចគ្រប់គ្រងកំណត់បន្ទាត់ព្រំដែនតំបន់កាន់កាប់របស់អាមេរិកនៅអាស៊ីបូព៌ា។
ដោយមិនបានប្រឹក្សាយោបល់ពីជនជាតិកូរ៉េណាម្នាក់ ពួកគេបានសម្រេចកាត់កូរ៉េពាក់កណ្ដាលតាមខ្សែស្របទី៣៨ដើម្បីធានាថា ទីក្រុងសេអ៊ូល នឹងស្ថិតនៅក្នុងផ្នែករបស់អាមេរិក។
កងទ័ពជប៉ុនដែលនៅក្នុងទឹកដីកូរ៉េខាងជើងបានសារភាពចុះចាញ់ទៅសូវៀត ខណៈទ័ពនៅកូរ៉េខាងត្បូងសារភាពចុះចាញ់ទៅអាមេរិក។ បើទោះជាគណៈបក្សនយោបាយកូរ៉េខាងត្បូងត្រូវបានបង្កើតឡើងភ្លាមៗ និងដាក់ឈ្មោះបេក្ខភាពផ្ទាល់ខ្លួន និងរៀបចំបង្កើតរដ្ឋាភិបាលទីក្រុងសេអ៊ូល រដ្ឋកាលយោធាអាមេរិកមានការភ័យខ្លាចនឹងពួកមាននិន្នាការឆ្វេងនិយមច្រើនក្នុងចំណោមបេក្ខភាពឈរឈ្មោះ។
រដ្ឋកាលដែលទទួលបានការទុកចិត្តពីអាមេរិក និងសហភាពសូវៀត ត្រូវគេរំពឹងថានឹងត្រូវជ្រើសបានពីការបោះឆ្នោតទូទាំងប្រទេសដើម្បីរួបរួមកូរ៉េឡើងវិញនៅឆ្នាំ១៩៤៨ ប៉ុន្តែភាគីទាំងសងខាងមិនទុកចិត្តគ្នាទេ។ អាមេរិកចង់អោយឧបទ្វីបទាំងមូលក្លាយជារដ្ឋប្រជាធិប្បតេយ្យ និងមូលធននិយម ចំណែកសូវៀត ចង់អោយប្រទេសនេះក្លាយជាប្រទេសគុម្មុយនិស្ត។
នៅទីបំផុត អាមេរិក បានតែងតាំងមេដឹកនាំប្រឆាំងពួកគុម្មុយនិស្ត Syngman Rhee ឡើងកាន់កាប់កូរ៉េខាងត្បូង។ កូរ៉េខាងត្បូង បានប្រកាសខ្លួនជាប្រទេសនៅខែឧសភាឆ្នាំ១៩៤៨។ Rhee ត្រូវបានចាត់តាំងអោយឡើងកាន់តំណែងជាប្រធានាធិបតីទីមួយនៅខែសីហា ហើយភ្លាមៗក្រោយពីឡើងកាន់អំណាចលោកបានចាប់ផ្ដើមសង្គ្រាមកម្រិតទាបប្រឆាំងនឹងពួកគុម្មុយនិស្ត និងពួកឆ្វេងនិយមផ្សេងទៀតនៅត្រឹមខ្សែស្របទី៣៨។
នៅក្នុងពេលដំណាលគ្នានោះដែរក្នុងទឹកដីកូរ៉េខាងជើង សហភាពសូវៀតបានតែងតាំងលោក Kim II-sung ដែលបានបម្រើការអំឡុងពេលសង្គ្រាមជាមេបញ្ជាការក្នុងកងទ័ពក្រហមរបស់សូវៀត អោយក្លាយជាមេដឹកនាំថ្មីនៃតំបន់ដែលស្ថិតក្រោមការកាន់កាប់របស់សហភាពសូវៀត។ Kim ឡើងកាន់អំណាចជាផ្លូវការនៅថ្ងៃទី៩ខែកញ្ញាឆ្នាំ១៩៤៨។ លោក Kim ចាប់ផ្ដើមចាត់វិធានការលើពួកប្រឆាំង ជាពិសេសពួកមូលធននិយម ហើយលោកក៏បានចាប់ផ្ដើមបង្កើតវប្បធម៌កាត់ទោស។ នៅឆ្នាំ១៩៤៩ កេរ្តិ៍ឈ្មោះរបស់ Kim II-sung បានរីកសាយភាយល្បីល្បាញទូទាំងកូរ៉េខាងជើង ហើយលោកបានដាក់ងារអោយខ្លួនឯងថា “មេដឹកនាំដ៏អស្ចារ្យ”។
នៅឆ្នាំ១៩៥០ Kim II-sung បានសម្រេចចិត្តព្យាយាមបង្រួបបង្រួមកូរ៉េឡើងវិញក្រោមការគ្រប់គ្រងតាមបែបគុម្មយនិស្ត។ លោកបានបើកការឈ្លានពានទៅលើកូរ៉េខាងត្បូង ដែលបានប្រែក្លាយទៅជាសង្គ្រាមមានរយៈពេល៣ឆ្នាំ និងបានសម្លាប់ពលរដ្ឋកូរ៉េជាង៣លាននាក់ ប៉ុន្តែប្រទេសទាំងពីរមិនអាចបង្រួបបង្រួមបានទេ ដោយត្រូវត្រលប់ទៅត្រឹមបន្ទាត់ព្រំដែនដើមវិញគឺខ្សែស្របទី៣៨។
ដូច្នេះជារួមមកកូរ៉េបែកបាក់ជាពីរប្រទេស និងប្រឈមសង្គ្រាមដល់បច្ចុប្បន្នគឺដោយសារការបញ្ចប់ទៅនៃសង្គ្រាមលោកលើកទីពីរ ការសម្រេចចិត្តយ៉ាងតក់ក្រហលរបស់មន្ត្រីអាមេរិកពីររូបក្នុងការកំណត់ព្រំប្រទល់នៅខ្សែស្របទី៣៨ និងការមិនទុកចិត្តគ្នារវាងអាមេរិក និងសហភាពសូវៀត។
Post A Comment: