រឿង បុរសកាស ៣០
កាលពីព្រេងនាយមានបុរសម្នាក់នៅស្រុកមួយ ឪពុកម្ដាយស្លាប់ទៅនៅកំព្រាតែម្នាក់ឯង
ហើយក្រលំបាកណាស់គ្មានទ្រព្យសម្បត្តិអ្វីទេ មានតែកាស ៣០
ច្រកក្នុងថង់ក្រវាត់ជាប់ចង្កេះជានិច្ច។ បុរសនោះពិចារណាថា
«អញទៅទីពឹងអ្នកណានឹងបានសុខ?» គិតទៅឃើញថា «គួរអញទៅជ្រកកោននឹងលោកក្រឡាហោមចុះ»។
គាត់ក៏ដើរចេញពីផ្ទះទៅដល់ក្រាបសំពះតាមសមគួរ។ លោកក្រឡាហោមសួរថា «ជីឯងមកពីស្រុកណា
មានការអ្វី?» បុរសនោះជម្រាបថា «ខ្ញុំបាទមកពីស្រុកឆ្ងាយ ឪពុកម្ដាយស្លាប់ចោលអស់ហើយ
នៅកំព្រាតែម្នាក់ឯង ខ្ញុំបាទមកនេះដើម្បីសូមជ្រកកោនបម្រើជាកូនក្មួយតទៅ
សូមព្រះតេជព្រះគុណមេត្តា»។ លោកនោះសួរថា «ជីឯងចេះអក្សរល្មមធ្វើជាស្មៀនបានឬទេ?»
បុរសជម្រាបថា «អក្សរខ្ញុំបាទមិនចេះទេ»។ លោកក្រឡាហោមប្រាប់ថា «យើងទទួលឱ្យនៅបាន
តែត្រូវឱ្យជីឯងបោសសម្រាមក្រោមផ្ទះយើងរាល់ថ្ងៃកុំខាន»។
បុរសនោះក៏នៅបម្រើបោសក្រោមផ្ទះរាល់ថ្ងៃដល់ចំនួន ៣ ឆ្នាំ។ ថ្ងៃមួយបុរសកាស ៣០
សួរមាតាលោកក្រឡាហោមថា «លោកយាយ! តើលោកក្រឡាហោមជាកូនលោកយាយកើតឆ្នាំខែថ្ងៃអ្វី
បានជាលោកមានបុណ្យមានទ្រព្យសម្បត្តិច្រើនម៉្លេះ?» យាយនោះប្រាប់ឆ្នាំថ្ងៃខែ
និងពេលកើតសព្វគ្រប់។
បុរសនោះចាំប្រាកដក៏កត់ត្រាទុកក្នុងកំណាត់សំពត់ចាស់មិនឱ្យអ្នកណាដឹងឡើយ។
ក្រោយមកលោកក្រឡាហោមសួរបុរសនោះពីថ្ងៃខែឆ្នាំកំណើតវិញ
បុរសនោះក៏យកកំណាត់សំពត់ដែលខ្លួនលួចកត់ត្រាឆ្នាំកំណើតរបស់លោកក្រឡាហោមនោះមកបង្ហាញ
ហើយប្រាប់ថាខ្លួនមិនចេះអក្សរទេ តែឪពុកម្ដាយផ្ដាំថាជាថ្ងៃកំណើតខ្លួន។
លោកក្រឡាហោមឃើញថ្ងៃខែឆ្នាំ និងវេលាកើតដូចខ្លួនបេះបិទ
ក៏គិតថាបុរសនេះនឹងមានបុណ្យស័ក្តិធំដូចខ្លួនមិនខាន ទើបសម្រេចចិត្តរៀបការកូនស្រីឱ្យ
និងបង្ហាត់បង្ហាញឱ្យធ្វើរាជការរហូតបានចូលគាល់ស្ដេច។
ក្រោយមកមានអ្នកច្រណែនទៅប្រាប់លោកក្រឡាហោមថា បុរសនោះភូតភររឿងថ្ងៃកំណើតទេ។
លោកក្រឡាហោមខឹងណាស់ក៏រកឧបាយកម្ចាត់ចោល ដោយប្រើឱ្យនាំទ័ពទៅបង្ក្រាបចោរ
(ក្នុងបំណងឱ្យស្លាប់ក្នុងសង្គ្រាម)។ ប៉ុន្តែបុរសនោះបែរជាមានជ័យជម្នះ
បង្ក្រាបចោរបានរាបទាបទាំងអស់។ ស្ដេចសព្វព្រះទ័យយ៉ាងខ្លាំង ក៏តែងតាំងបុរសនោះជា
«ក្រឡាហោម» ជំនួសឪពុកក្មេកដែលបានទទួលមរណភាពទៅ។
"សេចក្ដីអប់រំ៖ មនុស្ស កុំមើលងាយមនុស្ស"
ប្រភព៖ ដកស្រង់ចេញពីប្រជុំរឿងព្រេងខ្មែរ
