ផ្កាកុលាប មិនត្រឹមតែជាផ្កាសម្រាប់តាំងលម្អបន្ថែមសោភ័ណភាពប៉ុណ្ណោះទេ ប៉ុន្តែវាក៏ជាដំណាំសេដ្ឋកិច្ចដែលអាចជួយលើកកម្ពស់ជីវភាពបានយ៉ាងប្រសើរ។ ថ្ងៃនេះយើងនឹងសិក្សាពីបច្ចេកទេសដាំក្នុង "ជាលឫស្សី" ដែលជោគជ័យបំផុត។
១. ការរៀបចំសម្ភារៈ និងការផ្សាំ
- ជាលឫស្សី និងស្បោងប្លាស្ទិក៖ ប្រើស្បោងទ្រាប់ខាងក្នុងជាល ដើម្បីការពារកុំឱ្យជ្រុះដីពេលស្រោចទឹក។
- វិធីផ្សាំ៖ ប្រើឫសកំប្លោកបកសម្បករុំមែកដែលថ្លោសល្អ រួចចងថង់ប្លាស្ទិកពីខាងក្រៅ បាញ់ទឹកឱ្យសំណើមរហូតដុះឫស (ប្រហែល ១ ខែ)។
- ការលាយដី៖ លាយដីជាមួយជីកំប៉ុស ជីអង្កាម ស្លឹកឈើ និងស្មៅរលួយ។
២. បច្ចេកទេសដាំដុះ
នៅពេលមែកផ្សាំដុះឫសល្អហើយ យើងត្រូវយកមកដាក់ដាំក្នុងជាលដែលរៀបចំរួច៖
- ជីករណ្តៅជម្រៅ ៥ សង់ទីម៉ែត្រ។
- ក្នុងមួយជាលដាំតែ ១ មែក ប៉ុណ្ណោះ ដើម្បីឱ្យដើមថ្លោស និងបែកមែកបានពេញជាល។
៣. ការថែទាំក្រោយការដាំ
💧 ការស្រោចទឹក
ស្រោចទឹក ១ ថ្ងៃ ២ ដង (ព្រឹក-ល្ងាច) ដើម្បីរក្សាសំណើមដី។
🌱 ការជ្រួយដី
ឧស្សាហ៍បោចស្មៅ និងជ្រួយដីឱ្យធូរ ដើម្បីឱ្យឫសស្រូបយកជីជាតិបានល្អ។
🧪 ជី និងថ្នាំ
បាញ់ថ្នាំ និងដាក់ជី ១ អាទិត្យម្តង ដើម្បីការពារសត្វចង្រៃ និងជំនួយស្លឹក។
✂️ ការសម្អាត
បេះស្លឹកណាដែលមិនល្អចោល ដើម្បីឱ្យវាឆាប់ចេញត្រួយថ្មី។
"ផ្កាកុលាបមានអាយុ ៣ ខែ ចាប់ផ្ដើមចេញផ្កា និងអាចប្រមូលផលលក់បានហើយ។"
៤. ទីផ្សារ និងអត្ថប្រយោជន៍
បច្ចុប្បន្ន ផ្កាកុលាបក្នុងជាលឫស្សីមានតម្លៃចាប់ពី៖
៣,៥០០៛ - ១៥,០០០៛ / ជាល
ក្រៅពីតាំងលម្អ កុលាបក៏ត្រូវបានគេយកទៅធ្វើជាគ្រឿងសម្អាង តែ និងឱសថព្យាបាលជំងឺផ្សេងៗផងដែរ។
រៀបរៀងដោយ៖ BONGSOKLA
