អត្ថប្រយោជន៍នៃការធ្វើសមាធិ ចំពោះសុខភាព

មនុស្សមួយចំនួន ច្រើនយល់ច្រឡំថា សមាធិ ជាវិជ្ជាសម្រាប់ ព្រះសង្ឃ ដូនជី ឬមនុស្សចាស់តែប៉ុណ្ណោះ ជាហេតុធ្វើឲ្យគេយល់ថាការសិក្សាសមាធិជាការបង្ខាតពេលវេលា ឬជួនកាលមិនចង់ដឹង មិនចង់ឮទៀតផង។ នេះក៏ព្រោះតែពួកគេមិនទាន់យល់ច្បាស់ពីសមាធិនិងអត្ថប្រយោជន៍ របស់សមាធិ។

សមាធិ មានន័យថា ការតាំងចិត្ត ឬការតម្កល់ចិត្តយ៉ាងមាំ។ តាមការវិភាគពិចារណារបស់មហាវិទ្យាល័យនានាក្នុងពិភពលោកបានឃើញថា សមាធិជួយឲ្យយើងរៀនពូកែ សមាធិជួយឲ្យយើងមានសុខភាពល្អ សមាធិជួយឲ្យយើងលេងកីឡាបានល្អ ។ល។

ដើម្បីឲ្យកើតសមាធិក្នុងចិត្តត្រូវ ហ្វឹកហាត់ចិត្ត និងអភិវឌ្ឍន៍ចិត្ត។ ការហ្វឹកហាត់ចិត្ត គឺការរៀនស្គាល់ខ្លួនឯង និងស្គាល់ធម្មជាតិ ដោយចិត្តទៀងត្រង់ និងជ្រះថ្លា។ ការអភិវឌ្ឍន៍ចិត្ត គឺជាការលើកកំពស់ចិត្តរបស់ខ្លួន ប្រកបដោយគុណធម៌ សេចក្តីល្អ សេចក្តីហ្មត់ចត់ និងសេចក្តីរីករាយ។

ការធ្វើសមាធិ ល្អចំពោះសុខភាព

ធ្វើឲ្យសម្ពាធឈាមធ្លាក់ចុះ
កាត់បន្ថយការធុញថប់ក្នុងអារម្មណ៍
កាត់បន្ថយនូវភាពតានតឹង អាការៈឈឺក្បាល ការគេងមិនលក់ជាដើម
អាចជួយឲ្យអារម្មណ៍ និងអាកប្បកិរិយាមានភាពវិជ្ជមាន ព្រោះខួរក្បាលឬការគិតរបស់អ្នកមានភាពស្ងប់ស្ងាត់
ពង្រឹងនូវប្រព័ន្ធស៊ាំក្នុងខ្លួន បង្កើនថាមពលក្នុងការបំពេញការងាររបស់អ្នក៕