ការមិនព្រមទទួលបែបនេះក៏អាចទស្សន៍ទាយបានថា ប្រទេសខ្លះឈានដល់ការបញ្ចេញព័ត៌មានពីការប្រទះឃើញមនុស្សភពផ្កាយ ដើម្បីបង្វែរការចាប់អារម្មណ៍ពីគ្រោងការផលិតអាវុធសម្ងាត់ដល់កំពូលដូចជា ការផលិតយន្តទំនើបបំផុតដែលហៅថា ស្តែលថ៍ មានស្លាបបីជ្រុងជាដើម ។ ទោះបីយ៉ាងណាក៏ដោយ ក្នុងចំណោមព័ត៌មានល្បីរន្ទឺរទាំងព័ត៌មានពិត និងព័ត៌មានបង្វែងដាន សុទ្ធតែមានភស្តុតាងយ៉ាងជាក់ស្ដែងចេញពីសំណុំគ្រោងការអាថ៌កំបាំងតាមប្រមាញ់រក UFO (ថាសហោះនោះនិង មនុស្សភពផ្កាយ )ទាំងអស់ ។
ព័ត៌មានរូបភាពដែលរបូតធ្លាយចេញមកសុទ្ធតែមានហេតុផល២-៣ចំណុច គឺក្រុមមន្ត្រីជាន់ខ្ពស់ មិនចង់ឲ្យប្រជាជនងប់ងល់នឹងព័ត៌មាននេះជ្រុលហួសហេតុពេក ចំណុចបន្តមកទៀតជាការលក់ព័ត៌មាន និងចំណុចទី៣ បើកបង្ហើបព័ត៌មានព្រោះតែចង់ល្បី ។ ដោយសារព័ត៌មានអស់ទាំងនេះឯង បានធ្វើឲ្យអ្នកចាប់អារម្មណ៍ UFO អាចមើលឃើញពីតម្រុយវត្ថុដែលគេហៅថា វត្ថុមានជីវិតនៅក្រៅពិភពលោក (Extre-terres Trial) ឬ UFO នោះ មិនមែនជារឿងដែលបំភ័ន្តភ្នែកគ្នាតទៅទៀតនោះទេ ។
នៅក្នុងរូបភាព គឺជាភស្តុតាងមួយទៀតដែលបានធ្លាយចេញពីសំណុំអាថ៌កំបាំងនៃផ្នែកស៊ើបការសម្ងាត់រុស្ស៊ីដែលហៅកាត់ថា កា.សេ.បេ កាលពីអតីត ។ វាជារូបភាពយានអវកាស២គ្រឿង ថតបាននៅពេលយប់ ដែលក្រុមអ្នកជំនាញអះអាងថាពិតជាយាន UFO ។ យានទី១ មានរាងជាត្រីកោណ និងយានមួយទៀតកំពុងតែបញ្ចេញពន្លឺពណ៌សពីបាតពោះយាន ខណៈពេលហោះសំកាំង ។រូបភាពទាំង២នេះត្រូវបានគេរក្សាទុកនៅក្នុងសំណុំឯកសារសម្ងាត់របស់ កា.សេ.បេ ដែលមានឈ្មោះថា”សំណុំអាថ៌កំបាំងព្លូហ្វូដឺរ៍ ។ នេះគឺជាផលការងារខ្លះ ដែលកើតមានក្នុងអំឡុងសង្គ្រាមត្រជាក់រវាងសហរដ្ឋអាមេរិក និងរុស្ស៊ីដែលភាគីនីមួយៗលួចលាក់សាងអាវុធសម្ងាត់តាមស្វែងរកថាសហោះ ដើម្បីចម្លងយកបច្ចេកវិទ្យាជាន់ខ្ពស់នោះ ។
សង្គ្រាមត្រជាក់ដែលបានបញ្ចប់ទៅកាលពីឆ្នាំ១៩៩១នោះ នរណាៗក៏បានដឹងដែរថា វាជាសង្គ្រាមដែលវាស់ពីភាពឈ្នះចាញ់តាមរយៈសក្តានុពលតាមអាវុធយុទ្ធភ័ណ្ឌ និងបច្ចេកវិទ្យា ។ របាយការណ៍ និងរូបភាពអាថ៌កំបាំងខ្លះពីគ្រោងការព្លូហ្វូដឺរ៍ ត្រូវបានលេចធ្លាយមកក្រៅក្នុងឆ្នាំ១៩៩១ ដែលជាអំឡុងពេលអាណាចក្រកុម្មុយនីស្តសូវៀតដួលរលំល្មម ។ លោក គី គ្រូមូវីដ វិស្វករគ្រូបង្វឹកអ្នកហោះហើរអវកាសរុស្ស៊ី បានបើកបង្ហើបកាលពីខែកន្លងទៅនេះថា "ឯកសារដែលពាក់ព័ន្ធជាមួយ UFO ធ្លាយចេញកាលពីឆ្នាំ១៩៩១នោះ ភាគច្រើនៗគូសបញ្ជាក់ពីបច្ចេកវិទ្យាក្នុងការបើកបរយាន UFO ដែលបានអភិវឌ្ឍន៍ដល់កំរិតកំពូលទៅហើយនោះ ។ យោងតាមរូបភាពទាំងពីរនេះយើងអាចប្រាប់បានថា គ្រឿងយន្តរបស់យានភពផ្កាយរីកចម្រើនលើសយើងខ្លាំងណាស់ និយាយឲ្យខ្លីបើប្រៀបធៀបជាមួយយើងៗត្រឹមតែចាប់ផ្ដើមប៉ុណ្ណោះ ។
គ្រូបង្វឹកម្នាក់នេះព្រមទទួលស្គាល់ថា ខ្លួនឯងធ្លាប់បានប្រទះថាសហោះក្នុងអំឡុងពេលហ្វឹកបើកបរ រួមទាំងធ្លាប់ឃើញយាននេះបុកដី២-៣គ្រឿងទៀតផង ។ ដូចជាពេលរសៀលថ្ងៃទី២០ ខែកុម្ភៈ ឆ្នាំ១៩៦៨ អ្នកបើកបរយន្តហោះប្រដេញរុស្ស៊ីលោក អាំងគ្រី រ៉ាក់ម៉ាណូហូ បានបើកយន្តហោះ ម៊ិច-២៩ក្នុងល្បឿន៦០០មៃល៍ ក្នុង១ម៉ោង ក៏ស្រាប់តែមានយាន UFO រាងបីជ្រុងមួយដេញតាមពីក្រោយ ។ ក្រោយពេលយានអវកាសអាថ៌កំបាំងបានដឹងថា អ្នកបើកបរយន្តហោះម៊ិច មើលឃើញខ្លួនហើយនោះ វាក៏បន្ថែមល្បឿនហោះក្រវែលជុំវិញយន្តហោះម៊ិច ហាក់ដូចជាចង់បង្អួតពីសមត្ថភាព ។
ភ្លាមៗនោះដែរ អាកាសយានិករុស្ស៊ី បញ្ជាយន្តហោះឲ្យស្ថិតនៅកម្ពស់មួយស្មើយាន UFO ក្នុងគោលបំណងបាញ់កាំជ្រួចដាក់ ក៏ប៉ុន្តែហាក់បីដូចជាយានអាថ៌កំបាំងដឹងមុន វាក៏បន្ទាបខ្លួនហើយបាញ់មកមុនតែម្ដង ។ ១០នាទីក្រោយមកវាក៏បញ្ចេញផ្សែងពណ៌ក្រហមពីក្រោមពោះ ហើយភៀសខ្លួនក្នុងល្បឿនមួយដែលភ្នែកមនុស្សមើលមិនទាន់ ។ ហេតុការណ៍មួយទៀតដែលត្រូវបានគេកត់ត្រាទុកនៅក្នុងសំណុំឯកសារសម្ងាត់របស់ កា.សេ.បេ គឺកើតមានឡើងកាលពីថ្ងៃទី១៥ខែធ្នូ ឆ្នាំ១៩៨៧ នៅអាកាសយានដ្ឋានពាណិជ្ជកម្មមួយ ។
លោក មីណឺ រ៉ាល់ដឺរ៍ អតីតភ្នាក់ងារសម្ងាត់ដែលឈរជើងនៅបរិវេណអាកាសយានដ្ឋាននោះទទួលបានសេចក្ដីរាយការណ៍ថា មានយានចម្លែកមួយចុះចតយ៉ាងស្ងៀមស្ងាត់ក្នុងបរិវេណអាកាសយាន្តដ្ឋាន ។ អ្វីដែលចម្លែកមនុស្សជាច្រើននាក់អាចមើលឃើញយាននោះដោយភ្នែកទទេ ខណៈពេលដែលវាមិនអាចចាប់យករូបភាពរបស់វាបាន ។ ៣នាទីក្រោយមកខណៈដែលមនុស្សកំពុងតែផ្អើលស្រលាំងកាំងនោះ យានអាថ៌កំបាំងក៏បោះពួយទៅវិញបាត់ដោយគ្មានឮសម្លេងដូចកាលចុះចត ។ ក្រោយមកអ្នកដែលបានឃើញក៏សរសេរជារបាយការណ៍ថា យានអាថ៌កំបាំងហោះបោះពួយក្នុងបន្ទាត់ត្រង់ឡើងពីផ្ទៃព្រលានគ្មានទាំងសម្លេងគ្មានទាំងផ្សែង ។
ហេតុការណ៍មួយទៀត កើតមានឡើងកាលពីខែសីហា ឆ្នាំ១៩៨៧ កងយោធា និងក្រុម កា.សេ.បេ ទទួលបានបញ្ជាពីរដ្ឋាភិបាលរុស្ស៊ី ឲ្យគ្រប់គ្រងការពារយានអាវកាសអាថ៌កំបាំងមួយ មានរាងដូចបំពង់ ឬរាងដូចជាបារីស៊ីហ្គា បន្ទាប់ពីយាននេះបានចុះចតនៅអាកាសយាន្ឋានយោធា ក្នុងទីក្រុង លីនីនក្រាត ។ យានមួយនេះមានរាងទ្រវែងដូចជាបំពង់ ផ្នែកខាងក្រៅមានពណ៌ប្រផេះ ភ្លឺរលើបរលោង មិនដឹងជាសាងពីលោហៈអ្វី ។ បណ្ដោយរបស់វាមានប្រវែង១២ម៉ែត្រ ទទឹង៣ម៉ែត្រ និងមានជើងចតខ្ពស់ពីដីប្រវែង១២០ស.ម ។
រស្ស៊ីបានបញ្ជូនក្រុមជំនាញពីទីក្រុងមូស្គូ ដើម្បីឲ្យទៅបើកទ្វារយាននោះ មើលពីបច្ចេកវិទ្យាជាន់ខ្ពស់ដែលមាននៅខាងក្នុងតួយាន ។ តែនៅទីបំផុតគេមិនអាចបើកបាន អូសបន្លាយពេលរហូតដល់ទៅ១ខែ បន្ទាប់មកថ្ងៃមួយ នៅសុខៗយានអាថ៌កំបាំងបោះពួយទៅវិញបាត់ស្រមោល ៕
Post A Comment: