ពាក្យមួយម៉ាត់ដែល 'សម្លាប់' ទឹកចិត្តកូនឱ្យបរាជ័យតាំងពីមិនទាន់ចាប់ផ្ដើម

កូនយើងមិនដូចកូនគេ ឬមកពីម៉ែឪយើងមិនដូចម៉ែឪគេ?

លោកឧកញ៉ា វេជ្ជបណ្ឌិត គួច ម៉េងលី តែងប្រមើលមើលឃើញថា អ្នកអាណាព្យាបាលមួយចំនួនហាក់រមែងបន្ទោសបង្អាប់ដល់បុត្រខ្លួនថា កូនខ្លួនមិនល្អនេះ មិនល្អនោះ មិនដូចនឹងកូនគេ តែបើកូនធ្វើត្រូវ ឬសម្រេចអ្វីមួយនោះ គឺពុំដែលពោលពាក្យសរសើរម្ដងណាឡើយ។

ការបន្តុះបង្អាប់បែបនេះ ជាហេតុធ្វើឱ្យបុត្រាបុត្រីខ្លួនឮហើយ បាក់ទឹកចិត្ត អស់សង្ឃឹម និងលែងចង់ធ្វើអ្វីទាំងអស់ ព្រោះខ្លាចនាំមកនូវផលអវិជ្ជមាន និងគ្មានកម្លាំងចិត្តប្រឹងប្រែងអភិវឌ្ឍសមត្ថភាពឱ្យទាន់សង្គមឡើយ។

"ជួនកាលមិនមែនមកពី 'កូនយើងមិនដូចកូនគេ' នោះទេ តែការពិតគឺមកពី 'ម៉ែឪយើងមិនដូចម៉ែឪគេ'។"

🔍 ការរៀបចំ និងការយកចិត្តទុកដាក់

លោកឧកញ៉ាបានស្រាយបញ្ជាក់ថា ម៉ែឪគេចេះរៀបចំទុកដាក់កូន ងូតទឹកឱ្យកូន រៀបចំប្រដាប់ប្រដាឱ្យកូនទៅសាលារៀន បញ្ចុកអាហារ និងទម្លាប់ពោលពាក្យសរសើរ ចេះប្រើចិត្តសាស្ត្រលើកទឹកចិត្ត និងនិយាយស្ដីល្អៗទៅកាន់កូន។

តែផ្ទុយទៅវិញ ម៉ែឪខ្លះទៀត ព្រលឹមឡើងផឹកស្រា លេងបៀរ ប្រើហិង្សា ឈ្លោះទាល់ទែងគ្នា ជេរប្រទេចគ្នា និងប្រើពាក្យអសុរោះមកលើកូនជាដើម។ ចំណុចទាំងនេះហើយដែលធ្វើឱ្យកូនៗគិតថា ខ្លួនអន់ជាងអ្នកដទៃពិតមែន ទើបឪពុកម្ដាយនិយាយបែបនេះ។

💡 សារដាស់តឿនដល់អាណាព្យាបាល

ក្នុងនាមជាអ្នកជំនាញផ្នែកអប់រំ និងចិត្តសាស្ត្រ លោកចង់ដាស់តឿនដល់ឪពុកម្ដាយឱ្យ បោះបង់គំនិតប្រៀបធៀប ហើយងាកមកគិតពីចំណុចវិជ្ជមានរបស់កូនវិញ៖

ស្វែងរកចំណុចខ្សោយរបស់កូន ដើម្បីបំពេញបន្ថែម និងណែនាំ។
បង្កើនការពោលពាក្យសរសើរ និងផ្ដល់រង្វាន់លើកទឹកចិត្ត។
ផ្ដល់ភាពកក់ក្ដៅជារឿយៗ ព្រោះមនុស្សគ្រប់វ័យតែងត្រូវការការលើកទឹកចិត្ត។

🪞 ឆ្លុះកញ្ចក់មើលខ្លួនឯង

មុននឹងនិយាយប្រាប់គេឯងថា កូនខ្លួនមិនល្អដូចកូនអ្នកដទៃ ត្រូវឆ្លុះកញ្ចក់មើលខ្លួនឯងជាមុនសិនថា តើខ្លួនឯងជាម្ដាយឪពុកបែបណា? បើកូនគេល្អ តើម៉ែឪគេយកចិត្តទុកដាក់កូនកម្រិតណា? ចេះណែនាំ និងផ្ដល់ភាពកក់ក្ដៅដល់កូនដែរឬទេ?

បើឪពុកម្ដាយគិតតែពីឈ្លោះគ្នា លេងល្បែង និងជេរប្រទេចកូន នោះកូននឹងបាក់ទឹកចិត្ត ហើយធ្លាក់ខ្លួនអាក្រក់ដូចអ្វីដែលឪពុកម្ដាយបានលើកឡើងមែន។

"បើអាណាព្យាបាលចេះសរសើរ និងផ្ដល់ភាពកក់ក្ដៅ គេនឹងសប្បាយចិត្ត ហើយប្រឹងប្រែងក្លាយជាកូនល្អ ពលរដ្ឋល្អ និងជោគជ័យក្នុងជីវិតជាក់ជាមិនខាន។"