ក្នុងពេលដែលស្ត្រីមានគភ៌ នាងត្រូវឆ្លងកាត់ពេលវេលាមានផ្ទៃពោះ ជាពេលដែលនាងមានក្តីសុខខ្លាំងបំផុត ព្រោះវាជាដំណាក់កាលសំខាន់បំផុតដែលបានក្លាយជាអ្នកម្តាយ។
ការមានផ្ទៃពោះជាដំណាក់កាលដ៏ស្រស់ស្អាតបំផុតនៅក្នុងជីវិតនាង ហើយក៏ជាឱកាសមួយដែលអ្នកត្រូវមានការប្រុងប្រយ័ត្នបំផុត ចំពោះសុខភាពផ្លូវកាយ និងផ្លូវចិត្ត។
ដើម្បីមើលថែសុខភាពផ្លូវកាយរបស់អ្នកឱ្យបានល្អ អ្នកត្រូវឧស្សាហ៍ទៅជួបនឹងវេជ្ជបណ្ឌិត ដើម្បីផ្លាស់ប្តូររបបអាហារខ្លះផងដែរ។
ម្យ៉ាងវិញទៀត ដើម្បីរក្សារាងឱ្យបានស្អាត វេជ្ជបណ្ឌិតរបស់អ្នកនឹងណែនាំឱ្យអ្នកធ្វើលំហាត់ប្រាណងាយៗ ហើយក្នុងចំណោមលំហាត់ប្រាណទាំងនោះគឺ ការដើរ។
ការដើរមួយៗធម្មតានៅក្បែរឧទ្យានរបស់អ្នកអាចជួយពង្រឹងដល់ការគេង និងកាត់បន្ថយភាពតានតឹងរបស់អ្នក។
ការដើរជាលំហាត់ប្រាណងាយស្រួល។ វាជាលំហាត់ប្រាណបែបកំសាន្ត ហើយវាមិនត្រូវការគម្រោងចាំបាច់ ឬឧបករណ៍អ្វីឡើយ។ ស្បែកជើងមួយសម្រាប់ជាអ្វីដែលអ្នកនឹងត្រូវការ ដើម្បីត្រៀមខ្លួនក្នុងការដើរ។
ដើម្បីឱ្យកាន់តែដឹងច្បាស់ពីអត្ថប្រយោជន៍នៃការដើរក្នុងពេលមាន ផ្ទៃពោះ អ្នកគួរអានអត្ថបទខាងក្រោមដែលបង្ហាញពីអត្ថប្រយោជន៍ដ៏ច្រើន បានពីការដើរក្នុងកំឡុងពេលមានផ្ទៃពោះ៖
បំបាត់ភាពតានតឹង
ក្នុងពេលមានផ្ទៃពោះ ស្ត្រីគ្រប់រូបតែងតែមានអារម្មណ៍រវើរវាយ។ ជួនកាល អ្នកមានអារម្មណ៍សប្បាយរីករាយ ហើយពេលខ្លះទៀត អ្នកមានអារម្មណ៍ធុញថប់។ ការដើរក៏ជាលំហាត់ប្រាណមួយបែបដែលអាចជួយឱ្យរាងកាយបញ្ចេញអ័រម៉ូន អង់ដូភីន។ អរម៉ូនអង់ដូភីន ជាសារធាតុគីមីធ្វើឱ្យអ្នកមានអារម្មណ៍ល្អ។ ដូច្នេះ ការដើរជាឱសថព្យាបាលភាពតានតឹងរបស់អ្នក។ ប្រាកដថា ត្រូវដើរឱ្យតែពេលណាអ្នកមានអារម្មណ៍តប់ប្រមល់។
ព្យាបាលជម្ងឺទល់លាមក
អត្ថប្រយោជន៍ផ្សេងមួយទៀតគឺ វាអាចជួយព្យាបាលជម្ងឺទល់លាមក។ ប្រសិនបើអ្នកនៅតែធ្វើឱ្យរាងកាយសកម្ម បើទោះបីជាក្នុងពេលមានផ្ទៃពោះក៏ដោយ វាក៏នឹងជួយសម្រួលដល់ពោះវៀនផងដែរ។ ការដើររយៈពេលពី ១៥-២០ នាទីជារៀងរាល់ថ្ងៃ អាចជួយសម្អាតពោះវៀនរបស់អ្នកបានថែមទៀតផង។
ការពារពីភាពអស់កម្លាំង
ក្នុងពេលមានផ្ទៃពោះ ស្ត្រីភាគច្រើនឧស្សាហ៍ហត់នឿយ និងខ្សោយក្នុងត្រីមាសដំបូង ហើយនឹងកើតបែបនេះម្តងទៀតនៅត្រីមាសទី ៣។ ការសម្រាកឲ្យបានច្រើនក្នុងកំឡុងពេលមានផ្ទៃពោះ ពិតជាប្រសើរ តែទោះបីជាយ៉ាងណា ការសម្រាកច្រើនខ្លាំងពេកអាចធ្វើឱ្យមានផលអវិជ្ជមាននូវអ្វីផ្ទុយពីការគិតរបស់អ្នក។ ការសម្រាកច្រើនខ្លាំងពេកអាចធ្វើឱ្យអ្នកកាន់តែអស់កម្លាំង។ ការដើរលំហែអាចជួយប្រឆាំងនឹងភាពអស់កម្លាំង ហើយជួយបង្កើនកម្រិតថាមពលឡើងវិញ។
កាត់បន្ថយសម្ពាធឈាមរបស់អ្នក
តាមធម្មតា សម្ពាធឈាមរបស់អ្នកកើនឡើងក្នុងពេលមានផ្ទៃពោះ។ តែទោះបីជាយ៉ាងណា កម្រិតសម្ពាធឈាមខ្ពស់ខ្លាំងអាចធ្វើឱ្យកើតជំងឺព្រាយក្រឡាភ្លើង។ ការដើរជារៀងរាល់ថ្ងៃអាចជួយរក្សាកម្រិតសម្ពាធឈាមរបស់អ្នក។
ជួយពង្រឹងដល់ការមានផ្ទៃពោះធម្មតា
ការដើរអាចជួយពង្រឹងដល់ភាពបត់បែនរបស់អ្នក ហើយក៏ធ្វើឱ្យសាច់ដុំត្រគាករឹងមាំ ដែលអាចជួយឱ្យសម្រាលកូនបានងាយស្រួល, រហ័សរហួន និងគ្មានការឈឺចាប់។
ជួយឱ្យគេងលក់ស្រួល
ការដើរលំហែរយៈពេល ៣០នាទីក្នុង ១ថ្ងៃអាចជួយឱ្យអ្នកគេងលក់បានស្រួលក្នុងកំឡុងពេលមានផ្ទៃពោះ។
ជួយរក្សាទម្ងន់របស់អ្នក
ការដើរអាចជួយរក្សាទម្ងន់របស់អ្នក ហើយក៏អាចជួយគ្រប់គ្រងទម្ងន់ទារករបស់អ្នកក្នុងផ្ទៃដោយស្វ័យប្រវត្តិផងដែរ។ ទម្ងន់ទារកច្រើនខ្លាំងពេក អាចបណ្តាលឱ្យពិបាកក្នុងការសម្រាលតាមបែបធម្មជាតិ។ ដូច្នេះ ការដើរអាចជួយរក្សាទម្ងន់របស់ទារកក្នុងពេលសម្រាល៕
ប្រែសម្រួលដោយ៖ ដារ៉ា
Post A Comment: